العيشة بقت نار...بس احنا لسه بنضحك

العيشة....بقت نار

بس احنا....لسه بنضحك

الناس بتطبق سياسة....الضحك بدل العياط

_______________________________________

كل يوم الأسعار بتعلى....زى الصبح فى عز الصيف

ومافيش....سقف

ورغم كده تلاقى الناس....بتضحك فى طوابير العيش

و بتقول نكت....فى السوبر ماركت

كأننا داخلين مسرح....مش مول

المصرى هو الوحيد اللى ممكن يشترى حاجة...بنص مرتبه

ويقول....ولا يهمك المهم الصحة

المرتب بيمشى أسبوع....والباقى على الله

____________________________________

زمان كنا بنحسب المرتب....بالأسبوع

دلوقتى بنحسبه....بالساعات

تفتح التلاجة....تحسبها عاملة دايت غصب عنها

و تلاقى نفسك بتقنع العيال....ان العدس أكلة نبوية

الموضوع بقى محتاج شهادة صبر....مش شهادة ميلاد

لازم تطلع خبير اقتصاد....عشان تطبخ أكلة

______________________________________

النهاردة اللى عايز يعيش....لازم يكون دارس اقتصاد منزلى

و شهادة دولية....فى توزيع المرتب

كل طبق محتاج خطة مالية....وكل مشوار محتاج لجنة تسعير

بقت ميزانية البيت....زى ميزانية دولة

والمشكلة ان الدولة....عندها احتياطى 

واحنا عندنا....احتياطى كيس مكرونة

الأم بقت وزيرة مالية....والاب محافظ بنك

والعيال....لجنة دعم السلع

الغلا مش بس فى الاسعار....ده فى النفوس كمان

___________________________________________

الناس بقت مشدودة....العصبية زادت

والابتسامة....بقت رفاهية

لما تشوف حد....بيضحك فى الشارع

يا اما لسه قابض....يا اما خلاص فقد الأمل

بس اللى مخلى الدنيا ماشية....اننا بنعرف نضحك واحنا بنتوجع 

حد فهم....حاجة