كارثة التسونامى...كيف تتحول البحار الهادئة الى جحيم فى دقائق

 التسونامى 

غضب البحر

حين يقرر الكلام

من أيام الانسان الأولى على الأرض وهو بيحاول يفهم الطبيعة 

ليه المطر بينزل...ليه الريح بتعصف...ليه الشمس بتختفى 

لكن فيه لحظة معينة الطبيعة مابتشرحش فيها حاجة

بتكتفى انها تقوم  و تقعد فى ثوانى

لحظة فيها البحر الهادى الجميل اللى نقعد على شطه 

نسمع صوت الأمواج

يتحول فجأة لوحش هايج يمد لسانه لعشرات الكيلومترات

داخل اليابس ويكتسح كل حاجة تقف قصاده 

:اللحظة دى اسمها تسونامى 

ظاهرة مخيفة ضخمة مدمرة لكنها فى نفس الوقت لغز

علمى مذهل يجمع بين الجيولوجيا والفيزياء وقوة الطبيعة

المطلقة

تعالى نغوص مع بعض فى أعماق الموضوع

ماهو التسونامى ؟

كلمة تسونامى أصلها يابانى

 

تسو = ميناء

نامى = موجة

يعنى موجة الميناء

والتسمية دى جت لأن اليابانيين زمان لاحظوا أن أمواج

التسونامى بتوصل للموانى فجأة وبتكون أضخم وأعلى

من  الأمواج العادية

:التسونامى ببساطة

هو سلسلة من الأمواج البحرية العملاقة اللى بتتشكل  بعد

اضطراب ضخم تحت سطح البحر كالزلازل أوالبراكين

أو انهيارات أرضية فتندفع الأمواج بسرعة تصل أحيانا

ل ٨٠٠ كم / ساعة يعنى سرعة طيارة ركاب

الغريب أن الموجة فى أعماق البحر بتكون قليلة الارتفاع

متر واحد مثلا ويستحيل تلاحظها 

لكن أول ماتقرب  من الشاطىء وتدخل مياه ضحلة تتحول

لجدار مائى ارتفاعه ممكن يوصل ١٠ ، ٢٠ ، ٣٠ متر

:أنواع التسونامى

التسونامى مش نوع واحد...العلماء بيقسموه  حسب سبب تكونه

:١_تسونامى ناتج عن الزلازل البحرية

وهو الأشهر والأخطر ويمثل أكتر من ٧٠ % من حوادث التسونامى المعروفة

لما صفيحة أرضية تنزلق تحت أخرى فى قاع البحر

يحصل ارتفاع أو هبوط مفاجىء فى القاع فتتحرك كمية

مهولة من المياه مرة واحدة

:٢_ تسونامى ناتج عن البراكين

الانفجارات البركانية البحرية أو انهيار جدران البراكين

بيولد طاقة ضخمة تدفع المياه

:٣_ تسونامى بسبب الانهيارات الارضية تحت الماء

كتلة صخور ضخمة تقع فجأة فى الأعماق فتزيح كمية

هائلة من المياه

:٤_ تسونامى بسبب سقوط نيازك 

نادر جدا لكنه ممكن يحصل لو نيزك ضخم وقع فى المحيط

بيعمل موجات تعلو عشرات الأمتار

:أشهر الأماكن التى يحدث فيها التسونامى

رغم أن أى مكان مطل على المحيط ممكن يتعرض لتسونامى 

الا ان بعض المناطق أكتر عرضة

:١_ منطقة حلقة النار فى المحيط الهادى 

من أخطر مناطق الزلازل والبراكين في العالم

تشمل...اليابان...اندونيسيا...الفلبين...ساحل أمريكا الجنوبية...أمريكا الشمالية(كاليفورنيا و ألاسكا)

:٢_ المحيط الهادى 

خصوصا اندونيسيا...تايلاند...الهند...سيريلانكا

وقد شهد واحد من أعنف التسوناميات فى التاريخ سنة ٢٠٠٤

:٣_ البحر المتوسط (بدرجة أقل)

لكن حصل فيه تسونامى كبير فى الأسكندرية سنة

٣٦٥ م بسبب زلزال هائل

:٤_ جزر الكاريبى

 

لأنها منطقة نشاط بركان قوى

كيف يتكون التسونامى ؟

:الخطوات ببساطة

١_ حدوث اضطراب ضخم تحت سطح البحر

زى زلزال بقوة ٧ درجات فأعلى أو انفجار بركان أو انهيار أرضى

:٢_ انتقال الطاقة الى المياه

الاضطراب بيحرك  كمية مهولة من المياه لأعلى وأسفل

:٣_ تكون سلسلة موجات سريعة

الموجة تمشى بسرعة تصل من ٥٠٠ _ ٨٠٠ كم / ساعة

فى الأعماق

:٤_ اقتراب الموجات من الساحل

كل ماتقل  الأعماق تقل السرعة لكن يزيد الارتفاع

زى لما تضغط المياه فى مساحة أضيق

:٥_ وصول الموجة الشاطىء

فتظهر على شكل جدار مائى ضخم يجتاح المدن والقرى القريبة من الساحل

أمثلة حقيقية لتسونامى حدث فعلا

١_ تسونامى المحيط الهندى ٢٠٠٤

ده كان من أعنف الكوارث فى تاريخ البشرية

زلزال بقوة ٩،١ ضرب سواحل إندونيسيا ونتج عنه موجات

:تسونامى وصلت

الهند...سيريلانكا...تايلاند...الصومال

الضحايا تجاوزوا ٢٣٠ ألف شخص

٢_ تسونامى اليابان

زلزال بقوة ٩ قبالة ساحل اليابان الشرقى

وصلت الموجات ل ٤٠ متر فى بعض الأماكن

وكمان سببت كارثة مفاعل فوكوشيما النووى

تسونامى ألاسكا ١٩٥٨

ده غريب جدا مش نتيجة زلزال كبير بل انهيار أرضى هائل

وقع فى خليج ليتويا  عمل موجة ارتفاعها وصل ٥٢٤ مترا

أعلى موجة تم تسجيلها فى التاريخ

٤_ تسونامى الأسكندرية سنة ٣٦٥ م

سببه زلزال ضخم فى جزيرة كريت والموجة دخلت

الأسكندرية وغرقت  جزء كبير منها

أثر التسونامى على البيئة والناس

:١_ الدمار المادى

المياه لما تتحرك بقوة ألاف الأطنان تشيل كل شىء

بيوت...سيارات...عمارات...طرق...موانى...جسور

:٢_ فقدان الأرواح

التسونامى غالبا بييجى فجأة والناس ماتلحقش  تهرب

السرعة رهيبة والمياه بتجرف  البشر لمسافات بعيدة

:٣_ تدمير النظام البيئى 

تدمير الشعب المرجانية...تغير شكل السواحل

موت الأسماك...تسرب المياه المالحة داخل الأراضى الزراعية

:٤_ أزمات اقتصادية

السياحة تتوقف...الصيد ينهار...البنية التحتية تحتاج سنوات من الإصلاح

 الناس اللى بتنجوا أحيانا بتكون فقدت كل شىء

أهلها...بيتها...مدينتها 

كيف يمكن مواجهة التسونامى ؟

احنا مش قادرين نمنع التسونامى

لكن نقدر نخفف خسائره بطرق علمية قوية

١_ أنظمة الإنذار المبكر

مستشعرات  فى أعماق البحار بتحس بأى تغيير فى الضغط أو حركة المياه

وتبعت اشارات للأقمار الصناعية بتدى الناس وقت للهروب

٢_ تثقيف السكان

فى اليابان مثلا الأطفال فى المدارس بياخدوا تدريبات 

حقيقية على كيفية الهروب من التسونامى

٣_ بناء سدود وحواجز بحرية

زى الجدار البحرى اللى اتبنى بعد كارثة فوكوشيما فى اليابان

٤_ تحديد أماكن أمنه للهرب

لازم يكون فيه طرق مرتفعة قريبة ولوحات ارشادية بتوجه

الناس فورا

٥_ التخطيط الجيد للمدن الساحلية

ممنوع بناء مستشفيات ومدارس فى المناطق المعرضة

لتسونامى

٦_ زرع أشجار كثيفة قرب الساحل

الأشجار ممكن تقلل قوة الموجة

الخاتمة

التسونامى يفضل من أعظم تذكيرات  الطبيعة للبشر

ان مهما وصلنا للعلم والتكنولوجيا يظل فيه قوي أعظم 

كتير من قدرتنا

لكن فى نفس الوقت العلم نفسه هو السلاح اللى يحمينا

الإنذار المبكر...الوعى واحترام قوانين الطبيعة

هى طريقنا الوحيد لتقليل الخسائر

البحر ما بيهزرش

 

لكن نقدر نفهمه ونستعد له ونعيش جنبه بأمان

المصادر

هيئة المسح الجيولوجي الأمريكية

المعهد الوطنى لعلوم المحيطات

موسوعة بريتانيكا 

دراسات جامعة توهوكو...اليابان

تقارير الأمم المتحدة عن الكوارث الطبيعية